कृषी संस्कृती हा स्टार्टअप आहे, जो सामुदायिक शेती (Community Farming) आणि पुरवठा साखळी व्यवस्थापन (Supply Chain Management) क्षेत्रात कार्यरत आहे. विभक्त कुटुंब पद्धतीमुळे जमिनीचे विभाजन, पारंपारिक शेतीचे मर्यादित स्वरूप, रासायनिक खतांचा अतिवापर यामुळे निर्माण झालेले आजार जसे की कॅन्सर, जमिनीचा खालावलेला पोत, शेतीसाठी उपलब्ध मनुष्यबळाचा अभाव, नैसर्गिक आपत्ती, आणि अनिश्चित बाजारभाव या समस्या शेतकऱ्यांसमोर आल्या आहेत. गेल्या काही वर्षांत रासायनिक खतांच्या अतिवापरामुळे शेतीवर झालेले परिणाम आणि भविष्यातील शेतमालाच्या मागणी व पुरवठ्यातील तफावत लक्षात घेऊन कृषी संस्कृती शेतकऱ्यांना शाश्वत आणि शास्त्रीय पर्याय उपलब्ध करून देण्याचे ध्येय ठेवते. तंत्रज्ञानाचा वापर करून शेतकऱ्यांना थेट तज्ञांशी आणि बाजारपेठेशी जोडणे, तसेच विषमुक्त शेतीकडे शेतकऱ्यांना वाटचाल करण्यास प्रोत्साहित करणे ही काळाची गरज आहे. कृषी संस्कृतीचे मुख्य उद्दिष्ट म्हणजे विकसित तंत्रज्ञानाच्या साहाय्याने शेतकऱ्यांना एकत्र आणून तज्ञ सल्ल्याने शास्त्रीय पद्धतीचा अवलंब करून शेतमालाची गुणवत्ता वाढवणे. तसेच, त्या शेतमालाचे गुणवत्ता प्रमाणीकरण करून तो अंतिम ग्राहकांपर्यंत पोहोचवणे, असे आहे. कृषी संस्कृती शेतकऱ्यांना एकत्र करून त्यांना शाश्वत, शास्त्रीय आणि तंत्रज्ञान आधारित शेतीची साधने पुरवून शेतीमालाची गुणवत्ता सुधारण्यास आणि शेतकऱ्यांचा फायदा वाढवण्यास मदत करते.